კორუფციაში ბრალდებული მიხეილ სააკაშვილი უკვე არის კორუფციულ დანაშაულში მსჯავრდადებული - პროკურორი
....
საქართველოს მესამე პრეზიდენტის, მიხეილ სააკაშვილის საქმის პროკურორი, გიორგი მუჯირი აცხადებს, რომ ხარჯები, რომელმაც ჯამში 9 მილიონი ლარი შეაგინა, არ იყო გამოყენებული სააკაშვილის ოფისის მიერ იმ ხარჯებისთვის, რომელიც ქვეყნის ინტერესებს ემსახურებოდა.
მისი თქმით, ეს თანხები განკუთვნილი იყო სააკაშვილისა და მისი გარემოცვის პირადი ინტერესებისთვის.
„კორუფციაში ბრალდებული მიხეილ სააკაშვილი უკვე არის კორუფციულ დანაშაულში მსჯავრდებული, რაც იმას ნიშნავს, რომ უკვე დადგენილია, მიხეილ სააკაშვილმა ჩაიდინა კორუფციული დანაშაული, გამოხატული სახელმწიფო ბიუჯეტის სახსრების პირადი ფუფუნების მოთხოვნილებების დასაკმაყოფილებლად.
აღნიშნული თანხა, ცხრა მილიონი ლარი, ემსახურებოდა მიხეილ სააკაშვილის, მისი ოჯახის წევრების და მისი გარემოცვის კომფორტს და ფუფუნების მოთხოვნილებების დაკმაყოფილებას. რაც შეეხება ჯგუფურობის მოხსნას და ბრალდებულ თეიმურაზ ჯანაშიას ქმედების გადაკვალიფიცირებას, აღნიშნულ ნაწილში ბრალდების მხარე აუცილებლად გაასაჩივრებს მოსამართლის გადაწყვეტილებას და ჩვენ გვაქვს მოლოდინი, რომ ეს გადაწყვეტილებაც შეიცვლება და დაუბრუნდება პირვანდელ კვალიფიკაციას, როგორც ეს ბრალდების მხარეს ჰქონდა შეფასებული. ასევე, უნდა აღნიშნოს, რომ ცხრა მილიონ ლარში იყო უამრავი ხარჯი, რომელიც პირად და გარემოცვის ფუფუნებას ემსახურებოდა, იქნებოდა ეს სოფო ნიჟარაძის მოგზაურობისა თუ საჩუქრების ხარჯები, იქნებოდა ეს თიკა ბოკუჩავასთვის ნაჩუქარი მობილური ტელეფონი, იქნებოდა ეს საზღვარგარეთის საკურორტო ზონებში გადახდილი თანხები, თუ სხვა კიდევ უამრავი მსგავსი დანახარჯები, რაც ცალსახად და ერთმნიშვნელოვნად ემსახურებოდა მხოლოდ ფუფუნებას და არავითარ შემთხვევაში არ იყო ნაკარნახევი სახელმწიფო ინტერესებით“, – განაცხადა პროკურორმა.
