...

2025 წლის საბავშვო ევროვიზიას საქართველო უმასპინძლებს. სიმღერის საბავშვო ევროფესტივალი თბილისში 13 დეკემბერს გაიმართება.

მთავრობის განკარგულებიდან ხდება ცნობილი, რომ  საქართველოს ბიუჯეტიდან კონკურსის დაფინანსება 870 ათასი  ლარით გაიზრდება და 9 034 280 ლარს შეადგენს.

შესაბამისი ცვლილებები- „საბავშვო ევროვიზია 2025-ის ორგანიზებისათვის განსახორციელებელი ზოგიერთი ღონისძიების დაფინანსების შესახებ“ - 2025 წლის 6 აგვისტოს განკარგულებაში შევიდა, რომლის მიხედვითაც ღონისძიებისთვის 8 164 280 ლარი უნდა გამოყოფილიყო.

უფრო კონკრეტულად, დოკუმენტში ვკითხულობთ, რომ ამ თანხიდან 8 მლნ ლარი კულტურის სამინისტროსთვის არის გამოყოფილი, 164 280 ლარი ეკონომიკისა და მდგრადი განვითარების სამინისტროსთვის, ხოლო 870 ათასი ლარი - სახელისუფლებო სპეციალური კავშირგაბმულობის სააგენტოსთვის.

შეგახსენებთ, რომ საბავშვო ევროვიზია საქართველოში უკვე მეორედ ტარდება. საერთაშორისო სიმღერის კონკურსი თბილისში პირველად 2017 წელს ჩატარდა.