...

ბელგრადში მიმდინარე თავისუფალი სტილით ჭიდაობის მსოფლიოს ჩემპიონატის საქართველოს დელეგაციას მესამე მედალი ვლადიმერ გამყრელიძემ შემატა.

79 კგ წონით კატეგორიის ფინალში ჩვენებურმა რუსეთის წარმომადგენელ ახმედ უსმანოვთან 1:4 წააგო და მისთვის სადებიუტო მსოფლიოს ჩემპიონატზე მეორე ადგილს დასჯერდა.

გამყრელიძემ ფინალამდე ერთმანეთის მიყოლებით ლატვიელი ალანს ამიროვსკი (8:0), ყაზახი ბოლატ საკაიევი (8:2) და უკრაინელი ვასილ მიხაილოვი (10:4) დაამარცხა.

92 კილოგრამამდე წონით კატეგორიაში ბრინჯაოს მედალთან ახლოს იყო მირიან მაისურაძე. თურქ ფეიზულა აკთურქთან 19 წამით ადრე დაწინაურდა, მაგრამ ეს უპირატესობა ვეღარ შეინარჩუნა და 3:5 დამარცხდა.

19 სექტემბერს ბრინჯაოსთვის გივი მაჭარაშვილი იჭიდავებს.