...

მინდა, მივესალმო საქართველოს იმ 200 ათას მოქალაქეს, რომელიც გუშინ რუსთაველზე იდგა და გაცილებით უფრო მეტ მხარდამჭერს, ვინც იზიარებდა იმ სულისკვეთებას, რომელიც ძალიან ამაღელვებელი იყო. ფაქტობრივად, ეს ადამიანები იდგნენ ჩვენი ქვეყნის ღირსებისა და სუვერენიტეტის დასაცავად და სადარაჯოზე. ეს იყო ყველაზე დიდი პასუხისმგებლობით სავსე ლეგიტიმაცია იმისა, რომ იმ გზაზე, რომელზეც ჩვენ ვდგავართ, კიდევ უფრო მეტი პასუხისმგებლობით და ვალდებულებით ვიაროთ, – ამის შესახებ საპარლამენტო უმრავლესობის წევრმა, რატი იონათამიშვილმა პლენარულ სხდომაზე განაცხადა.

მან ოპოზიციას მიმართა, ხელისუფლების მხარდამჭერების მიმართ სიძულვილის ენას ნუ იყენებენ.

„მინდა, ოპოზიციას მივმართო, ვინც საოცარი სიძულვილის ენას იჩენდა ასეულობით ათასი ქართველის მიმართ წინა დღეებში, გუშინაც და დღესაც გააგრძელეს ეს სიძულვილის ენა, ცოტა მეტი მოკრძალებით და მოწიწებით ისაუბრეთ ამ ღირსეულ, პატრიოტ ქართველებზე, ვინაიდან მათ შეურაცხყოფას არავის ვაპატიებთ. სიძულვილი დამღუპველია, თუ ეს აქამდე ვერ გაითვითცნობიერეთ, მოგიწევთ ამ რეალობის მიღება“, – განაცხადა საპარლამენტო უმრავლესობის წევრმა.

რატი იონათამიშვილმა გამჭვირვალობის შესახებ კანონპროექტზეც ისაუბრა და აღნიშნა, რომ ამ ინიციატივის განხილვა გასცდა ერთი კონკრეტული კანონპროექტის განხილვის პროცესს და გაცილებით უფრო მნიშვნელოვანი ღირებულებითი არჩევანის წყალგამყოფის დანიშნულება შეიძინა.

„ჩვენ აუცილებლად მივიყვანთ ამ საქმეს ბოლომდე. გუშინ ჩვენმა საზოგადოებამ ამის ლეგიტიმაცია ცალსახად და მკაფიოდ მოგვცა და ვალდებული ვართ, დავიცვათ ჩვენი მოსახლეობის არჩევანი, ჩვენი მოსახლეობის დაკვეთა, იმიტომ, რომ არაფერია იმაზე ღირსეული, ემსახურო შენს ქვეყანას, შენს ხალხს და ამ სამსახურით გახადო შენი ქვეყანა უკეთესი. ევროინტეგრაციის გზაზე ყველა წარმატება ჩვენ მოვუპოვეთ ქვეყანას. თქვენ (ოპოზიცია) ყველა წარმატებას უშლიდით ხელს, არაფერი გამოგივიდათ და ასე იქნებ მომავალშიც. ჩვენ მივიყვანთ ამ ქვეყანას ბოლომდე – ევროკავშირამდე ღირსებითა და სიამაყით“, – განაცხადა საპარლამენტო უმრავლესობის წევრმა.