არა რუსულ კანონს! - ქუთაისში აქცია-მსვლელობა გაიმართება
..
დღეს, 7 მაისს ქუთაისში რუსული კანონის საწინააღმდეგო აქცია-მსვლელობა გაიმართება.
ორგანიზატორების მიერ გავრცელებული ინფორმაციის თანახმად მსვლელობა 18:00 საათზე, ცენტრალური მოედნიდან დაიწყება და რუსთაველის გამზირზე მდებარე „ქართული ოცნების“ ოფისისკენ აიღებს გეზს, შემდგომ კი ქალაქის სხვა ქუჩებზე გაგრძელდება.
„ქუთაისში უწყვეტი პროტესტი გრძელდება.
7 მაისს, 18:00 სთ.-ზე გელოდებით ცენტრალურ მოედანზე.
ცენტრალური მოედნიდან მსვლელობით გავემართებით რუსული ოცნების ოფისთან.
ჩავივლით რუსთაველის გამზირს, გადავინაცვლებთ ჯავახიშვილის ქუჩით ბუხაიძის ქუჩაზე, ავალთ გამსახურდიაზე, აღმაშენებელი-ტაბიძის კვეთით დავბრუნდებით ქალაქის ცენტრალურ ნაწილში.
ბოლო გაჩერება - რუსული რეჟიმის ქუთაისის ფილიალი (ქ. ქუთაისის მერია).
ცვალებადი ამინდის გამო, დაგახვედრებთ საწვიმრებს.
გელოდებით ყველას, ვინც ევროპასა და რუსეთს შორის სწორ არჩევანს აკეთებთ.
საქართველო გაიმარჯვებს! ქართველი ხალხი გაიმარჯვებს!
#არარუსულკანონს
#არარუსულრეჟიმს“, - ნათქვამია განცხადებაში.