სამედიცინო ცნობის მიხედვით დადგინდა, რომ ბრალდებულის ცუდად გახდომის მიზეზი უჟანგბადობა იყო - ადვოკატი
...
სამედიცინო ცნობის მიხედვით დადგინდა, რომ ბრალდებულის ცუდად გახდომის მიზეზი უჟანგბადობა იყო, - ამის შესახებ საპროტესტო აქციების ფარგლებში დაკავებული ერთ-ერთი პირის ადვოკატმა დავით ჭიკაიძემ განაცხადა, რომელმაც სასამართლო სხდომა პროტესტის ნიშნად დატოვა.
როგორც ადვოკატმა განმარტა, აღნიშნულ სისხლის სამართლის საქმეში, სასამართლო სხდომაზე ადვოკატის დასწრება აუცილებელია და როდესაც სამუშაო პირობების იქნება დამაკმაყოფილებელი, ის და სხვა ადვოკატებიც სასამართლო სხდომაში მონაწილეობის მიღებას კვლავ გააგრძელებენ.
"საქმის განხილვის დასაწყისში მაშინ, როდესაც მოსამართლე ბრალდებულთა ვინაობას ადგენდა, ერთ-ერთი ბრალდებული ცუდად გახდა. სასწრაფო სამედიცინო დახმარების გამოძახება გახდა საჭირო. სამედიცინო ცნობის მიხედვით დადგინდა, რომ ბრალდებულის ცუდად გახდომის მიზეზი უჟანგბადობა იყო. დაცვის მხარემ მანამდეც ვთხოვეთ სასამართლოს, რომ შეეცვალა სხდომათა დარბაზი, რაც შესაძლებლობას მოგვცემდა, რომ დაცვის მხარეს ნორმალურ ვითარებაში გაგვეგრძელებინა მუშაობა. ამის მიუხედავად ბატონმა მოსამართლემ უარი განაცხადა შუამდგომლობის დაკმაყოფილებაზე.
პროცესზე წარმოდგენილია ქართული ენის არ მცოდნე პირი და საქმეც ისეთი სისხლის სამართლის კოდექსით მიმდინარეობს, სადაც ადვოკატების ყოფნა სავალდებულოა. მათ სახაზინო ადვოკატები დაენიშნებათ. ჩვენ აუცილებლად მივიღებთ მონაწილეობას, როცა შესაბამისი სამუშაო პირობები იქნება შექმნილი. ჩვენი მოქმედება მიმართული იყო იქითკენ, რომ ჯანმრთელობის მდგომარეობის გაუარესება არ მომხდარიყო და არა იმისკენ, რომ სასამართლო სხდომის მიმდინარეობა ჩაშლილიყო“,- განაცხადა ჭიკაიძემ.
ცნობისთვის, პროცესზე ირაკლი მიმინოშვილი შეუძლოდ გახდა.
