English 
ავსტრიის მხარესთან ერთად არაერთ მნიშვნელოვან პროექტს განვახორციელებთ - ოთარ შამუგია
...
გარემოს დაცვის და სოფლის მეურნეობის მინისტრი, ოთარ შამუგია ავსტრიის საგანგებო და სრულუფლებიან ელჩს საქართველოში, თომას მიულმანს და სოფლის მეურნეობის, სატყეო მეურნეობის, რეგიონების და წყლის მართვის საკითხებში ახალ ატაშეს, კარინ დოფელბაუერს შეხვდა,- ინფორმაციას გარემოს დაცვისა და სოფლის მეურნეობის სამინისტრო ავრცელებს.
მინისტრმა კარინ დოფელბაუერს საქმიანობის დაწყება მიულოცა და წარმატება უსურვა. ატაშეს საქმიანობა, საქართველოსთან ერთად, ხუთ ქვეყანას - სომხეთს, აზერბაიჯანს, თურქეთს, ყაზახეთსა და უზბეკეთს მოიცავს.
შეხვედრაზე მხარეებმა სამომავლო თანამშრომლობის საკითხები განიხილეს. გარემოს დაცვის და სოფლის მეურნეობის მინისტრმა, ავსტრიის მხარეს, წლების განმავლობაში არსებული მჭიდრო თანამშრომლობისა და საქართველოს მუდმივი მხარდაჭერისთვის მადლობა გადაუხადა.
„ავსტრიის მხარესთან ერთად არაერთ მნიშვნელოვან პროექტს ვახორციელებთ. დარწმუნებული ვარ, ჩვენი თანამშრომლობა მომავალშიც ნაყოფიერი იქნება. აქტიურად ვმუშაობთ, რომ მაქსიმალურად სწრაფად გავატაროთ რეფორმები, როგორც სოფლის მეურნეობის, ისე გარემოს დაცვის სექტორში, მით უმეტეს, ახლა, როდესაც ევროინტეგრაციის გზაზე ვდგავართ და კანდიდატის სტატუსის მიღებას ველოდებით. შესაბამისად, ავსტრიის გამოცდილების გაზიარება ჩვენთვის ძალიან ღირებული და მნიშვნელოვანია“, - განაცხადა მინისტრმა.
“შეხვედრაზე საუბარი შეეხო სოფლის მეურნეობის სექტორში, 10 წლის განმავლობაში წარმოებისა და ექსპორტის გაზრდილ მაჩვენებლებს, მესაქონლეობის დარგის განვითარების გზებს, ღვინის ბაზრის დივერსიფიკაციისთვის გატარებულ ღონისძიებებს, სატყეო სექტორში განხორციელებულ რეფორმებს, მათ შორის, ტყის კოდექსს. მხარეებმა სოფლის მეურნეობის მიმართულებით არსებულ გამოწვევებზე ისაუბრეს. ავსტრიის მხარემ გამოცდილების გაზიარების კუთხით მზაობა გამოთქვა“,- აღნიშნულია გარემოს დაცვის და სოფლის მეურნეობის სამინისტროს მიერ გავრცელებულ ინფორმაციაში.
