...

აფხაზეთის თვითგამოცხადებული რესპუბლიკის საგარეო საქმეთა სამინისტროს შეიძლება ისევ სერგეი შამბამ უხელმძღვანელოს. ამის შესახებ ტელეგრამის არხი RESPUBLICA წერს.

შამბა საგარეო საქმეთა სამინისტროს ხელმძღვანელობდა 1997 წლის მაისიდან 2004 წლის ივნისამდე. 2004 წლის ივნისში მან თანამდებობა დატოვა და საპრეზიდენტო არჩევნებში იყარა კენჭი. 2004 წლის 15 დეკემბერიდან ის კვლავ ხელმძღვანელობდა საგარეო საქმეთა სამინისტროს. 2010-2011 წლებში იყო პრემიერ-მინისტრი, ხოლო 2020 წლის ივლისიდან - უშიშროების საბჭოს მდივანი.

RESPUBLICA-ს ინფორმაციით, უშიშროების საბჭოს მდივნად რაულ ლოლუა დაინიშნება, რომელიც მანამდე არ იყო დამტკიცებული გუდაუთის რაიონის ადმინისტრაციის უფროსის პოსტზე.

მანამდე RESPUBLICA ასევე წერდა, რომ საგარეო საქმეთა სამინისტროს ხელმძღვანელის პოსტზე ერთ-ერთი პრეტენდენტი სახელმწიფო უსაფრთხოების სამსახურის თავმჯდომარის მოადგილე ზაალ ხვარცკიაა.

აფხაზეთის ლიდერმა ასლან ბჟანიამ 7 მაისს საგარეო საქმეთა მინისტრი ინალ არძინბა გაათავისუფლა. არძინბამ თქვა, რომ მან თანამდებობიდან გადადგომა "ახალ სამსახურზე გადასვლასთან დაკავშირებით" გადაწყვიტა.