...

რესტორან „რეტროს“ მფლობელის ადვოკატის, ლევან მახარაშვილის განცხადებით, სიმართლეს არ შეესაბამება განცხადება იმის შესახებ, რომ კომპანიაში დასაქმებული იყვნენ რუსეთის მოქალაქეები, რაც თანამშრომლების მხრიდან  იწვევდა წყენას.

როგორც ადვოკატმა  განაცხადა, კონფლიქტის მიზეზი გახდა იმ თანხის განაწილება, რომელსაც მომხმარებლები ოფიციანტებს უტოვებდნენ. ადვოკატის ინფორმაციით, აღნიშნული თანამშრომლები რესტორანში რამდენიმე წელია მუშაობენ და მათი მხრიდან არავითარი პრეტენზია არ გამოთქმულა.

„გავრცელებული ინფორმაცია, თითქოს კომპანიაში დასაქმებული იყვნენ რუსეთის მოქალაქეები და ეს იწვევდა წყენას, არის სიცრუე და გამოგონილი, ვინაიდან, კომპანიაში დასაქმებულია 34 თანამშრომელი, რომელთაგან მხოლოდ 2-ია რუსეთის ფედერაციის მოქალაქე, დანარჩენი 32 საქართველოს მოქალაქეა. აღნიშნული პირები 6-7 წელია დასაქმებულია და მათ შორის კონფლიქტი არასდროს ყოფილა. კონფლიქტის მიზეზი გახდა ე.წ. ჩაის განაწილება, ანუ იმ თანხის, რომელსაც მომხმარებლები ოფიციანტებს უტოვებენ და რომლის განაწილებაშიც ადმინისტრაცია საერთოდ არ ერევა. მოხდა ასეთი შემთხვევა, რომ ერთ-ერთ სტაჟიორს ამ „ჩაიდან“ გაუნაწილეს 10 ლარი, რომელიც მოწმეთა ჩვენებებით დგინდება. სწორედ ამან გამოიწვია მათ შორის დაპირისპირება, ამას არაერთი მოწმე ადასტურებს. რაც შეეხება ბრალდებულს, მან განაცხადა, რომ ეს იყო კომპანიაში დადგენილი წესი, რომელიც ცვლილებას არ ექვემდებარება. აღნიშნულის შემდეგ, მან სცადა დარბაზიდან გაეძევებინა ერთ-ერთი ოფიციანტი, რა დროსაც თემური წააქციეს და წაქცეულს სხეულის სხვადასხვა არეში ურტყამდნენ ამავე კომპანიაში დასაქმებულები. არსებობს ამის ვიდეოჩანაწერი, რომელიც გუშინ ამოიღეს და გამოძიებას სრულად გადაეცა. ჩვენ ვითხოვთ, რომ ამ ძალადობაში მონაწილე ყველა პირი დაისაჯოს. რაც შეხება თავად ბრალდებულის დამნაშავეობას, ჩვენ სასამართლოში დავამტკიცებთ, რომ მას დანაშაული არ ჩაუდენია“, -განაცხადა ლევან მახარაშვილმა.

მისივე განცხადებით -კადრებში ჩანს, რომ რესტორნის მფლობელი ძირს ეცემა და წაქცეულს რამდენიმე თანამშრომელი ურტყამს. თუ რესტორნის მფლობელი დასაქმებულებს წლების განმავლობაში დამამცირებლად ექცეოდა, ამის თაობაზე პრეტენზია უნდა გამოეთქვათ, რაც არ მომხდარა.

„ჩემი ინფორმაციით, აღნიშნული თანამშრომლები რამდენიმე წელია მუშაობენ და მათი მხრიდან არავითარი პრეტენზია არ გამოთქმულა. ესეც რომ დავუშვათ, არცერთ თანამშრომელს კანონმდებელი არ ანიჭებს იმის უფლებას, რომ კომპანიის დამფუძნებელს ფიზიკურად გაუსწორდეს და სცემოს. მას ძალიან ბევრი ფიზიკური დაზიანება აქვს, სამედიცინო დახმარება გაეწია. უფრო მეტიც, გუშინ დაკავების იზოლატორიდან სასწრაფო დახმარებით გადაიყვანეს, ისე ცუდად იმყოფებოდა ჯანმრთელობის მდგომარეობის კუთხით. 2-ჯერ აქვს გულის ოპერაცია გაკეთებული. ჩვენ დავაფიქსირეთ პოზიცია, წარვადგინეთ მტკიცებულები და გამოძიება ვალდებულია, ინციდენტში მონაწილე ყველა ბრალდებული გამოავლინოს“,- განაცხადა ლევან მახარაშვილმა.

შეგახსენებთ, რესტორან “რეტროს” ერთ-ერთმა თანამშრომელმა სოციალურ ქსელში ვიდეოჩანაწერი გაავრცელა, სადაც რესტორნის მფლობელი თანამშრომელს ხელს კრავს და დაწესებულებიდან აგდებს. მისივე ინფორმაციით, რესტორნის მფლობელმა, თეიმურაზ ვარშანიძემ თანამშრომელზე ფიზიკური ძალადობა ქუჩაშიც გააგრძელა. მოგვიანებით, შინაგან საქმეთა სამინისტრომ ბათუმში, რესტორან „რეტროში“ თანამშრომლის მიმართ ძალადობის ფაქტზე, ობიექტის მფლობელი დააკავა. შინაგან საქმეთა სამინისტროს ცნობით, მომხდარზე გამოძიება სისხლის სამართლის კოდექსის 126-ე მუხლით მიმდინარეობს.