...

საქართველოს საკალათბურთო ნაკრები შემოდგომაზე მსოფლიო ჩემპიონატზე ითამაშებს. ჩვენი ფედერაცია გუნდის გაძლიერების მიზნით უცხოეთში კალათბურთელებს ეძებს და რამდენიმე ვარიანტი აქვს, მაგრამ, როგორც ჩანს, ყველაზე რეალური ნაიჯელ ვილიამს-გოსი იქნება.

28 წლის ლეგიონერს თამაში პირველ და მეორე ნომრებზე შეუძლია – ილიას ზუროსის გუნდის ყველაზე პრობლემატურ პოზიციებზე.

ვილიამს-გოსი სადღეისოდ მადრიდის რეალის კალათბურთელია, მაგრამ კონტრაქტი სეზონის ბოლოს უმთავრდება. შესაძლოა, სწორედ ეს ფაქტი იქცეს მისი საქართველოს ნაკრებში თამაშის მიზეზი. საქმე ის არის, რომ ვილიამს-გოსი ამერიკელია და ევროპული პასპორტი ახალი გუნდის მოიძიებას გაუადვილებს.

ვილიამს-გოსი NBA-ს 2017 წლის დრაფტზე იუტა ჯაზმა 55-ე ნომრად აირჩია, მაგრამ მოედანზე ყოფნა ძალიან მცირე დროით უწევდა და ევროპას მოაშურა. ევროპაში სერბული პარტიზანის, ბერძნული ოლიმპიაკოსისა და რუსული ლოკომოტივ-ყუბანის რიგებში უთამაშია. სერბეთსა და საბერძნეთში თამაშის შუაში ისევ NBA-ს დაუბრუნდა იუტა ჯაზის შემადგენლობაში ითამაშა, მაგრამ ისევ მცირე დროით.

ვილიამს-გოსს აშშ-ს ნაკრების მაისურით 19-წლამდელთა მსოფლიოს ჩემპიონატი აქვს მოგებული;

2018 წელს მოიგო სერბეთის თასი და იმ მატჩის საუკეთესო კალათბურთელი გახდა. გარდა ამისა, არის 2018 სერბეთის ლიგის MVP, საუკეთესო მექულე და ასისტენტი;

ოლიმპიაკოსში თამაშისას კი, ბერძნულ all-star-შიც ითამაშა;

რეალთან ერთად 2021 და 2022 წლებში მოიგო ესპანეთის სუპერთასი; 2022 წელს გახდა ესპანეთის ჩემპიონი; 2023 წელს მოიგო ევროლიგა და გასულია ესპანეთის ჩემპიონატის ნახევარფინალში.

2023 წლის მსოფლიოს ჩეპიონატი 25 აგვისტოდან 10 სექტემბრის ჩათვლით ფილიპინებში, იაპონიასა და ინდონეზიაში ჩატარდება. საქართველოს ნაკრების მეტოქეები F ჯგუფში სლოვენია, ვენესუელა და კაბო-ვერდე არიან.