ექსკლუზივი: რა შეხება ჰქონდა დღეს დაკავებულ პირს მიხეილ სააკაშვილთან
...
დღეს, 20 ოქტომბერს, ცნობილი გახდა, რომ შსს-ს მიხეილ სააკაშვილის მიერ საქართველოს სახელმწიფო საზღვრის გადმოკვეთის საქმეზე კიდევ ერთი პირი - 1989 წელს დაბადებული გიორგი ნარიმანიძე დააკავა, CNews-ს ექსკლუზიური ინფორმაციით, ნარიმანიძე იმ „ტრაილერის“ მძღოლია, რომლითაც მესამე პრეზიდენტი უკრაინიდან საქართველოში ჩამოვიდა, თუმცა როგორც ნარიმანიძის ადვოკატის, გოგა გოგინავას საუბრიდან ირკვევა, ნარიმანიძემ არ იცოდა, რომ სააკაშვილმა საქართველოს საზღვარი გადმოკვეთა.
CNews-ი გიორგი ნარიმანიძის ადვოკატ გოგა გოგინავას ესაუბრა:
- ვინ არის გიორგი ნარიმანიძე?
- გიორგი ნარიმანიძე წოწორიას მძღოლია.
- იმ წოწორიას, რომლის სახლში სააკაშვილი დააკავეს?
- დიახ. წოწორიას რამდენიმე ტრაილერი ჰყავს და ერთ-ერთი ტრაილერის მძღოლი ნარიმანიძეა.
- ანუ, ტრაილერს, რომლითაც მიშა საქართველოში ჩამოვიდა, უშუალოდ ნარიმანიძე მართავდა?
- არა.
- აბა?
- იცით, როგორ არის? - მძღოლი ერთის ნაცვლად, შეიძლება, მეორე მანქანაზე დაჯდეს, მაგრამ აქ ასეთი თემა იყო: ჩამოსვლის მეორე დღეს, წოწორიამ დაურეკა და უთხრა, ფოთში ჩემი ტრაილერია, რომელშიც არის ტვირთი და ეს ტვირთი დაარიგე ობიექტებზეო. ნარიმანიძემ ჩამოიყვანა ტრაილერი თბილისში და მორჩა.
- ანუ, თბილისში ტვირთი იმ ტრაილერით ჩამოიტანა, რომელშიც სააკაშვილი იჯდა?
- კი.
- მანქანაში რა ტვირთი იყო?
- არაჟანი და ეგეთი რაღაცები.
- გამოძიება ნარიმანიძეზე როგორ გავიდა?
- არ ვიცი, მასალები ჯერ არ გადმომცემია.
- თქვენი დაცვის ქვეშ მყოფი როდის დააკავეს?
- გუშინ.
- მანამდე დაკითხვაზე ხომ არ იყო დაბარებული?
- კი, როგორც მოწმე იყო დაკითხული.
ავტორი: ზუკა ნემსაძე